Finis

Làgrim, vegnii pur giò senza misura!
Formee ona ronsgia, on fiumm, on lagh, on mar
Ch'el me poda negà ancamì adrittura
E insemma a mì tuttcoss, compres l'altar

Della mia religion!... Santa impostura
Che, a crédigh, el mè coeur el gh'ha de car,
Content d'èss mennaa a bev fin che la dura
Anca se in fond el càliz l'è inscì amar!!...

E el fond el gusti adess: chè in d'on minutt
El mè bell paradis de carta-pesta,
Quand men credevi, l'è squaraa del tutt!!...

Làgrim, vegnii pur giò liberament!...
Giò a rosc!... per lavà via quel pocch che resta:
Scendra d'amor... e tenc de giurament!!...

(1892)