L'alter dì tutt'a on tratt gh' è staa on moment
Che a dì la veritaa la m'è girada!
Figurass che, fasend ona pissada,
M'è vegnuu giò on slavagg de sangu' foghent.

Te voeutt vedè - hoo pensaa - che borli dent
Ancamò de bell noeuv in la mennada
Che soo mì 'l prezzi che la m'è costada
Duu o trii ann fa, de cruzzi e patiment?!

Per fortuna se ved che l'è staa on cas,
Come succed de spess in Primavera,
A quei che va soggett al sangu' de nas.

Va ben; ma a mì m'ha de toccà anca quell
Che quand i vènn gh'hann troppa bella ciera
Ghe faghen fà de scàrich a l'usell?!
(30.5.42)

II

Purtropp me sont illus, i mè car gent,
Che la fuss inscì liscia la bugada!
El bon che s'erom su 'na bonna strada,
Dopo quattr'o cinqu' dì de coeur content,

I mè donn, giust incoeu, improvvisament
Hann ciappaa n'altra brutta sacquaggiada
Quand gh' hoo annonziaa, dopo d'avella fada,
Che m'è vegnuu de noeuv el sangu' fument.

In quanto a mì, me gira pussee i ball
Al penser di volt mai de mèttes sotta
Anmò cont la cannetta e el pappagall

Che nanca se tirass l'ultima botta:
Se sto debet l'è vora de pagall,
Ormai no me n'importa pù nagotta!!
(1.6.42)

III

Pascienza: per conclud la cicciarada
A sora el taccoìn di mè accident,
Ve disaroo che adess duu o trii sapient
Fann forsi cunt de dagh ona pestada

In de 'l mortee ai càus concorrent
Ch'hann faa resuscittà sta sanguannada,
Per decid la condanna pù adattada
E strangolalla senza compliment.

Senti a discor de "radioterapia";
E per quell, ghe n'hoo no, mì, de paur
Se se trattass de desfescià st'arlìa.

L'è on intervent che 'l dovriss vess sicur:
Trattà coi "ragg", ma senza economia,
Di robb che, in vitta, staven sempr'al scur!
(3.6.42)

IV

Hoo fenii incoeu la terza applicazion
De trè sedutt ognunna de qui "ragg"
Che dovrissen avegh el gran vantagg
De ridù quella gianda a la reson

Per fà che la disturba pù i fonzion
Inerent a la canna del pissagg
E che la sia fenida cont quell scagg
Che tegneva i mè donn in apprension.

E voeura el Ciel, dopo sto battaclan,
Che no me troeuva anmò settaa in su l'assa
Col risultaa d'on pugn de mosch in man;

Come fa col brutt temp la nebbia bassa,
Conforma del proverbi di villan:
Che tal le troeuva e tal-e-qual le lassa.
(9.7.42)