Quand che 'scolti Chopin

Quand che 'scolti Chopin gh'hoo nò besògn
de tegnì i oeucc avert e de vedè;
i sò nòtturna gh'hann dolcezza assee
per pitturà d'azur tutt'i mè sògn.

Quand che 'scolti Chopin nò me servissen
scinivej liber, sparmì de dispiasè,
i sò polacch gh'hann denter fòrza assee
per trovà spazi e per impadronissen.

Quand che 'scolti Chopin pòdi fà a men
de Carla Fracci e de chi per lee,
i sò mazurch metten i al ai pee
e mì balli, leggera, in del seren.

D'on bòtt capissi quell che ghe voeur
per podè gòd de 'sta musica d'incant:
domà tre ròbb, però i pussee important,
dò orecc che 'scolten e on tocchell de coeur.