Sant Ambroeus de primavera

Da via Lanzon, da san Michel del Doss,

Da la pusterla coi torrion rifaa,

Che la se poggia lì dessora al foss

Senza pù acqua e tutt quattaa de praa,

De sotta ai piant che, tra piccoi e gross

Se distenden in piazza e sul segraa,

Tra i arch de Anspert che fann a sciòss

Con la facciada e i capitéi striaa,

Là doe rid anmò san Sigismond

A l'ombria del portich del Bramant,

Tira l'arietta fresca che confond

I secci come fussen di minut...

E inscì la primavera col sò incant,

In mezz a sbir doraa la brascia tuttI

Sant Ambroeus d'estaa

Se corri minga al fresch... foo ona s'cioppada!

Ne podi propi pù (disi fra mì)

E trovandom denanz a la facciada

De Sant Ambroeus... si, speccia... voo dent chì!

Ma però in del gel de la navada

(Sconquassada in l'agost quarantatri)

Par de sentì di vos... ona ventada

De son e de paroI... cossa voeur dì?

« Hinn passaa i Goti, i Visigoti, i Arian,

Franchi, Borgond, e con la fiamma e 'I fér

EI Barbarossa infamm, e su Milan

Tredes secoj de storia e milla guérr...

Nissun m'ha toccaa dent, salvo per poch

I car liberator a tramm in tocchI »

Sant Ambroeus d'autunn

O beata giornada settembrinna

Che te smorzet in d'on ross ricamm,

Anca in mezz a la truscia cittadinna

Te me fett incantaa come on salamm!

E guardi in alt, e doo uno doggiadinna

Al mé belI sant Ambroeus, coi tor in fiamm,

Che con aria serenna e bericchinna

Se parlen fra de lor, come on riciamm.

Voeuna la dis: «Ste fett lì, cardeghetta,

Barbonna de statura e de campann,

A buttat giò Milan fin quand el spetta?»

E l'altra la rispond: «El ver mé dann

L'é che purtropp, apénna de chì a on poo

Mi sont in l'ombra e tì ancamò al sô! »

Sant Ambroeus d'inverna

O sant Ambroeus, in sto invernasc dannaa

T'hoo vardaa tanti volt con commozion;

Battevi i dent, e tutt infagottaa

Stavi lì impalaa 'me on garindon

A rimirà i tò tor discompagnaa,

I tò tecc, i tò mur, i cornison,

La cuppola, i pilaster ben ligaa

In l'armonia d'ona gran passion!

La gran passion che per miara d'ann,

Intorna ai tò béi sass ai tò volton

Ross in del vesper concertaa a campann,

L'é vegnuda giò, giò, per i stagion

Me ona ventada a brascià sù i me vecc...