Hoo ravanaa  'sti dì in d'on mè cassett

per vedè se trovavi certi foeuj

d'on'epoca lontana e, inscì, regoeuj 

idej per scriv quajcossa de concett.

E invece (guarda on poo!), 'me 'na scorlida,

me salta ai oeucc 'na busta ormai sbiavida

con dent fotografji di temp passaa

ormai stramort e squas desmentegaa.

Impattaccaa  ancamò su cartonzitt

bej spess e dur coi bord tutt sagomaa,

sìbén on poo ingialdii e on poo smaggiaa,

soriden i mè vecc 'me duu spositt.

"Ma varda on poo", me disi tutt sorpres,

"che bel donnin che l'era ai sò vint ann

"'sta mia mammetta col nasin frances,

"la camisetta bianca, senza ariann,

"a pizz e bottonitt fin sott al coll,

"on coo de cavej negher voltaa in dent,

'''na cadenella d'or (e nò d'argent)

"e on fà modest ma minga propi froll...

* * *

"EI mè papà anca lù (che bell omettI)

"col coll de la camisa alt 'me on mur,

"i duu risvolt inamidaa, ben dur,

"el cravattin de ras luster e strett.

"Sott a ona testa de cavej biscent,

"cont i barbis a ponta voltaa in sù,

"el rid, se ved, de gust, propi content

'''me se quajdun avess copponaa-sù".

Ma quist hinn di regord ch 'hoo nò vivuu

perché in del temp de 'sti primm document

mi seri nanca al mond e hoo nò poduu

cognoss...con tant anticip.. i mè gent.

Regordi sì, in la nebbia del passaa,

on dì de festa quand el mè papà

(mi seri anmò on fiolett on poo genaa)

el m'ha portaa per man a celebrà

on cert aveniment: ona Vittoria

che, insemma a milla e milla combattent

aveva conquistada anlù con gloria

in quatter ann de guerra e de torment.

Fasevi cert fadiga a staggh adrée

(seri on gognella sui noeuv o des ann)

on poo per i mè gamb nò longh assée

e on poo per el gran strepet e l'afann.

De sott a "Garibaldi" in gran statura

(de fianch a ona sciesada de personn

che se calcaven pur senza indisponn)

el mè papà el se cava, in gran premura,

el spolverin portaa sul sò vestii.

Me salta ai oeucc, del rest giamò stremii,

(e a quij de vari sciori lì present)

on stomegh de medaj tutt sberlusent.

Prima d'allora mai me seri accort

ch'e! mè papà el gh'avess 'sti berlinghitt

pendent de la giacchetta, coi nastritt

de tanti bej color per drizz e stort.

Cammini, nò per quest, on alter poo

tegnuu semper per man, con alt el coo;

ed ecco che me troeuvi in d'ona strada

con tanti bej palazz: on'infiorada

de gran poggioeu, finester damascaa,

bander al vent e tanta, tanta gent

che la vosava, calorosament:

"Viva l'Italia!", "Viva i sò soldaa!".

E intanta che fasevi la gran via

(ch'hoo poeu savuu invodada al gran Poetta)

vegniva giò sul coo, sù la giacchetta

'na muccia de bej fior in frenesia.

In mezz a 'sto vosà, a 'sto evvivazza,

emm faa, pur ancamò, tant'altra strada.

Emm passaa el Domm, el Cors, quaj altra

piazza quattaa pur tucc de fior: ona fioccada.

'Sta festa e 'sta gran folla inscì inmattida

(coi poer crist ch'aveven faa la guerra)

la propinava ona stagion nudrida

per la Nazion, l'Italia, la soa terra.

Son poeu andaa cà, a la fin, propi stracch mort

cont el coo ciocch ma con quell mè papà

content 'me l'hoo pù vist per tanti intort

che l'ha subìi fin a la tarda età.

* * *

Passaa on des ann, me son trovaa sul coo

on gran capell coi piumm de gall cedron;

seri anca mì content ma domà on poo....

gh'era per l'aria certa agitazion....

Parlaven tucc de rivendicazion,

de lott del class, partii, de socialisma;

ma la sostanza l'è che, in cataclisma,

per mì se trasformava on'ambizion.

* * *

Per grazia del signor, con gran sospir,

con quaj giboll, ma anmò con la mia pell,

dopo quaj ann passaa, de gramm, in gir,

el mè "Paes" son ritornaa a vedell.

Col gel sott al barbozz, sul coo, sù i pée,

avevi tant sognaa 'sto gran moment;

quel de tornà a Milan e, amnò pussée,

coi rest del mè fantastich regiment.

Avevi rivangaa, con tant'amor

el "quatter de November del vintun"

tegnuu per man, desott a tanti fior

e in mezz a tanta gent in dolz autun.

* * *

Avevi giust sognaa... perché del sogn

me son scoduu de colp, in on moment....

Seri rivaa, a la fin, oltra a Codogn...

in d'on gran camp...ma de... concentrament....