quand vess cristian sincer l'era duvis
savè combatt con forza e dignitaa
l'idolatria e la severitaa
de l'imperador roman dur e decis.

Ne sann quaicoss i "Martir" seppellii
trovaa in di scav sott a l'altar maggior
insemma al Sant che, d'alta fed contrii,

di primm cristian e per sò grand amor
l'ha cercaa pas in mezz a la soa gent
per vess "pastor del ciel" anlù umilment.

Gramm e difficil e pericolos
eren i temp antigh del primm tresent;
la fed manifestada di credent
la reclamava on sens, tant prodigios,

de vess consideraa miracolos.
Sfida con gran coragg, apertament,
la religion, i fals comandament
di "superior" potent e minaccios.

La gesa infatti, senza vess la primma,
l'ha quasi cert trovaa on sò ponte genial;
de Barnaba scernii per vess in climma

con quella certa "Font Battesimal"
che anmò nel secol giust de Nost Signor
l'era sfidà la mort o cent terror.