« Quattordes » la gh'ha scritt in sul porton.

On gran porton cont i dò carreggiad

de beol saccagnaa per i strusad

che i carr d'on temp gh'hann faa, sora, a monton.

Tutt lavoraa de ferr on cancellon,

reffignaa-sù per milla invernisad,

el menna in del cortil dove i rizzad

s'hinn succeduu per ses generazion.

De marmor on navell, tond e massizz,

cont on bell mascheron sul rubinett;

la scala coj basej gris de sarizz

e in torna des ringher dove i lenzoeu

mes'ciaa cont i mudand, maj e calzett,

gottonen-giò (tegnuu de lazziroeu),

come i scol de l' acquiroeu:

la cà in Via Sanzio dove, on dì lontan,

son vegnuu al mond anmì come on cristian.