|
|
||
| Testo originale | Traduzione | |
|
On Natal different
Ona volta sola a l'ann el Felìs el tirava giò la clèr de l'osteria al podisnaa: l'era el dì de Natal! Ona volta a l'ann el podeva mett i gamb sott al tavol insemma a la Tognina e ai so fioeu: la Lucia, la Rita, l'Ugo, e gustà la pollina arrost con la mostarda, in santa pàs, o insci, almen, el sperava, perché on quaj rantegh de aventor gh'era mai vèrs de desfesciall. Gh'era semper quell deperlù, quell in ròtta con la miee, quell ch'el soffegava a stà ona sera in cà sóa... E insci, anca a Natal, gent per i pee! Quell'ann lì, con la clèr giamò a metà, el Felìs l'era dree a dagh l'inviada ai solit tiratard, tegnii su de gir de 'l Merlotti, ona màggia, che, per el fatt de vèss vedov e sol, el stentava comè a inviass. La Tognina, d'on bott, la se fa smorta... poeu rossa... e la sbottiss: "Felìs, corri dessora, l'è rivaa el moment...". Prima an'mò che respondess el Felìs, salta-su 'l Merlotti: "Corri mì a ciamà la levatrice... !", tutt content d'avè schivaa de 'ndà a cà. Ai vott de sera, ona tosetta la se lassava ninà, a turno, in di brasc de la Lucia e la Rita (giamò in via de sposass tutt e dò) e de l'Ugo (on sperlonga ch'el faseva giamò el pre-militar), inlocchii de la contentezza de vegh ona sorellina de fà ballà me 'na pigotta. El Felìs, foeura de lu... el magonava de scondon, intant ch'el smicciava sott-via la sóa Tognina che, dopo squas vint'ann, la gh'aveva faa sta bella improvvisada, e, de bott, l'ha mettuu el fonografo a tromba su la ringhera, cont el disco de la Pastoral e la manetta a tutta càrega... Foeura tutt i inquilitt! On dass la vos, on botta e risposta, on piccà i man, in la nott pussee bella de l'ann... ! Sul gas, smorzaa, la pollina, mezza cotta, la sfreggiva in del grass caggiaa
El dì adree, San Steven, in gesa. El scior Prevost: «...Qui petis?... Baptizari... ». «Franca!», hann risponduu la Rita cont el Merlotti, i Padritt. «Giontèmegh anca Anna, el nomm de la mia poera miee...!», l'ha replicaa 'l Merlotti, magonent... ! Foeura, sul piazzal, duu pegoree sonaven la piva. De l'altra part, ona squadra de "pre-militar" la marciava inanz e indree intant che la cantava: "A chi spartir le terre? Turati disse - Mai! - Cammina lungo i fossi, qualcosa spartirai... !" e de la bocca, i nivolett de fiaa, compagn de incens, andaven su... su...
Anca per lor l'era Natal| |
|
|
On Natal different (Franca
Brambilla)
