Letter (Giuseppe Margorani)     

 

Testo originale Traduzione letterale 

 

Letter

In d'on cassett, el terz, del sò comò,
sconduu sòtta tri o quatter fazzolett,
la ten on bell pacchett
ligaa cont on nastrin de seda bloeu
hinn letter, letter vegg e on poo ingialdii:
i primm letter d'amor...
quei che lù in temp de guerra quand l'era in Russia semper el scriveva,
inscì, quand el podeva...
poeu cosa sia success s'è mai savuu
però de letter ghe n'è rivaa pù...!
Gh'è passaa on poo de ann pien de dolor,
de dispiesè, de pèna,
poeu l'ha trovaa on brao fioeu,
la s'è sposada, l'ha miss sù famiglia,
duu fioeu, adess sposaa;
la gh'ha pù de marì, l'e andaa de là
e la viv deperlee.
Hinn passaa sessant'ann,
lee l'ha giamò compii i settantasett
però ogni tant l'e lì,
la derva quell cassett,
la guarda el pacchettin senza toccall,
le lassa in santa pas
perchè magari el podaria desfass...
le guarda e basta, ghe se streng el coeur,
i oeucc se inumidissen
intanta che la ment la torna indree
e la scancella i ann...
Hinn semper lì i letter, deperlor,
in d'on canton sconduu...
domà per lee... i primm letter d'amor...!

 

Commento

 

Invia i tò penser, i tò emozion (anca in italian o ne la lengua che te par)