No, nun cognossom no sta vita quietta,

senza frecass, mostosa, trappontada

de bei sogn, con l'erbetta su la strada,

dove se gusta el vin e la donnetta;

dove l'è longa longa la giornada;

dove, al caffè, se troeuva la gazzetta

che cunta su, sul fa d'ona zabetta,

la storia de la vita complicada.

Chi i bei campann se parlen tra de lor,

e i pivion poden god, come ona stanza,

la piazza veggia per giugà a l'amor.

Chi on vermout el se gusta, a poch a poch,

guardand foeura el mercaa, pien de bondanza