Tessera d'identità (Luigi Medici)                          

Tessera d'identità

Cavei castan (d'argent) bisc, capricios;

oeucc on poo de scapusc; nas aquilin;

duu sfris de barbisitt; laver fogos

e on nèo su la ganassa piscinin;

de corp on poo grassott, puttost bassin;

d'indol quiett; de caratter pontiglios;

de coeur, de coo, de sangu tutt meneghin,

pur parland el dialett come on «arios».

Me pias la vita e godi a entusiasmamm

de tutt i sò color e i sò savor

in barba al moeud de tucc i menagramm,

perchè se gh'è on coeur san, ona rodella

che gira ben e la salut in fior

la vita cribbi l'è pur anca bella!