Te see andada anca tì, povera Diana,
inscì cara e devota al tò padron!
Ona malinconia pussée che umana
la te velava i oeucc umil e bon.

Longa distesa in su la terra sana,
sòra ai sciamp lungh e sècch poggiaa el muson,
pareva te capisset, sacranon,
che l'ultim'ora l'era pu lontana.

E'l Sol el te mandava i sò ultim ragg
quasi on salud amis, confortadòr,
come per ditt che tucc semm de passagg;

e tì, fassada in de quel sò calòr,
i orècc bass, el fiaa curt in del mostacc,
te ghe rendevet l'anima al Signòr.

(Sì! perchè quand on coeur l'è inscì decis
a dà e ridà senza pretend on'inga
come se pò pensà ch'el gh'abbia minga
on tocchellin de post in Paradis?).