Sura Marchesa, mì l'hoo semper ditt,

e 'I diroo semper, che se fùss poètta

vorrev senz'olter quèlla soa cagnètta

portalla ai stèll a fùria de sonitt.

Che la creda che, in gener de tottitt,

quèsta la se pò dì pù che perfetta;

domà a guardagh adòss, subet l'allètta

a toeulla in brasc per fagh mila basitt.

L'è tant cerosa e amabil con la gent,

che cont i soeu grazijnn la se guadagna

el coeur de tucc, e 'I mè principalment.

Insòma no gh'è minga la compagna

per spiret, per bellezza e per talent,

l'è tutt quèll mai che pò rivà ona cagna.