Laghett alpin

Sott ai montagn, in scim'a la vallada,
gh'è sconduu. in mezz ai lares, ciar e quiett,
pien de ciel senza nivol, on laghett,
doe l'acqua l'è limpida e giazzada.

La ven, leggera com'on fil, di vett
e la va denter tutta la nottada
ma, in del dì, la dà foeura e la se mett
a fà, giò per i bosch, ona cascada.

E la par nanca pù quella de prima,
torbida e scura 'dess, fra tanti sass
e tanti gorgh, che ghe fan sù la grima...

L'è propi vera che per dagh al ciel
l'occasion de risplend e de speggiass
in del tò coeur, senz'ombra e senza vel,

bisogna 'vegh in l'anima la pas!