Testament

Me piasaria, sul gust di Patriarca,

morì serenament in del mè lètt.

De moeud che ‘l dì che la rivass la barca,

per tajà-giò el mè fil coi forbisètt,

gh’avessi intorna tutta la mia gent

che la scoltass componta el mè progètt.

Domà che avendegh de lassà pù nient,

ghe disaria di bon paròll almen,

che podèssen servì de testament.

Ve lassi el sô, ve lassi nientemen

che ‘l ciel coi nivol bianch e vaporos

che ‘l fann parì ancamò pussee seren.

Ve lassi la beltà di bosch ombros,

di praa smaltaa de cent e cent color

di collin verd e di montagn maestos.

Ve lassi poeu el profumm de tutti i fior,

l’armonia di torrent e di cascad

e riciamm di uselitt incantador.

Ve lassi lagh e fiumm coi sò vallad,

el mar con la soa grisa solitudin,

e l’aria pura cont i sò ventad.

Ve lassi l’onestà, la mansuetudin,

la tolleranza, la cavalleria,

la giustizia, la pas e l’abitudin

de dì semper el ver come se sia.

E infin, ve lassi la bontà, l’onor,

la pazienza, la calma e l’allegria.

E da ultim el primm…che l’è l’amor!