Ges

Varda, varda la strada
che mi hoo faa in la vitta...
Varda! L'e seminada
de ges.
Ges a manzinna e a dritta.
Dò sces,
vist de lontan.

Oh, ges del mè Milan!
Oh, ges de Porta Noeuva!
Gesa di Gesuitta...
Parrocchia de San March...
Sant'Angiol... (Paviment
de quadrej sbirolaa...
Odor de vecc, odor
de muff, de camolaa...
Ancamò ghe l'hoo in ment,
anca se adess i fraa
n'hann faa foeura on splendor...)

Ges di ann innocent!...
Gesa de San Francesch...
De San Bartolomee...
Cresima... Comunion...
L'anima che tripilla
per fà la Confession...
Bej ann! Bej dì! La mamma
la me menna per man
al mes de la Madonna...
Duu did dent in la pilla
de l'acquasanta... El segn
de cros...
La predica noiosa...
Malinconia di vos
che canten i letanj...
La Messa i dì de festa
con la mamma e el papà...
E foeura, a l'aria fresca, dopo, tirand el fiaa.

Ges di ann innocent! Santa Maria Aracoeli,
gesa di Bonfradej,
gesetta di student...
I student del Parin...
" On'ave e on lumin
prima de fà i esamm...
Bej temp!... Bej ann!...

O ges de la mia mamma!
O ges domà de lee!...
Ges de tucc i sò cruzzi,
de tucc i sò magón...
Gesa de San Camill.
L'è là, che la pregava
quand che mì s'era al front...
- "Ave Maria..." -. Gotton
ai oeucc... Lee la pregava...
La pregava per mì...
Ges de tucc i sò cruzzi,
de tucc i sò magon...
Gesa de la Vittoria...
Gesa de la Passion...
Poeu pù nagòtt. Inferma.
Do ges. La Trinitaa,
voeunna. San Calimer,
l'altra.
Quand hoo miss via el papà...
Quand hoo miss via la mamma.
Quand ghe passi, voo dent...
E i vedi ancamò là.

O ges de la mia vitta,
de quella propi mia!
Santa Francesca. Spos.
Gesa del mè bell sogn!
Parada in ross e or...
La musica de l'orghen...
I ver... Poeu sott brazzett.
Ah, sott brazzett, per semper!...
O ges de la mia vitta,
de quella propi mia!
Cappella de Viarenna...
Battesim del gognín...
Già, sòtta a Sant Eustorg. Chi pussee milanes,
pussee del me rattín,
nassuu a Porta Cinés?

Cappella del Collegg
de Via de la Passion...
Oh, che gran dì, gognin!
La Prima Comunion.

E adess? Adess mi giri
el nòst Milan con lor...
A Messa vemm in Domm...
Ma quand passi denanz
a voeunna di mè ges:
- Ecco -, ghe cunti: - chì
vegnevi sempre mì,
quand... -
- Quand? -. - Eh, tanti ann fa.

E pur me par de ved
li anmò la mia mammetta,
lì anmò el mè papà...
Vuj completà la filla.
Completalla, gognin!
Voeuri vedè la gesa
doe te se sposet tì.
L'è minga assee. Poeu quella
doe te faree el Battesim.
Quel del tò primm. L'è assee.

Poeu basta. L'altra, l'ultima
in doe passaroo mì,
quella, per forza, on dì
te ghe la tacchet tì.