De tì soo propi minga 'se pensà,

eppur, quand te me guardet, soeujà mi,

me par che i tò bei oeucc in del guardà

faghen de tutt per podè fass capì.

Alora senti el sangu a trepilà

e sbattom in di venn come per dì che,

anben còi cavei gris, podi sperà

de tornà a viv anmò in grazia a tì.

L'è on sogn, ona illusion, on tradiment

che se prepàra e che pò famm pati?

Cossa m'importa se per vess content

l'è necessari prima de soffri.

In sul tramont on ragg de sô l''è assee

per fà lusì anca i veder del sorèe.