La campanella de San Cels

Ah! citto, citto!... lassem sentì

Sto son patètich, sta campanella"

Sta cara amisa di mee primm dì! –

Cara vosetta, l'è ancamò quella!

L'è anmò l'istessa dopo vint'ann!

L'è sèmper fresca, l'è sèmper bella! –

Per mì i vos mòrbid di bej tosann

Hin vegnuu rùsgen de che son vìa;

Ma tì! – bambinna in tra i campann:

Te gh'ee anmò tutta quella magìa

Che in di primm ciàcer g'hann i bambitt,

Che ne comòeuven per simpatìa!

Me croda i làcrem in del sentitt!

Che te me tÌret tutt in la ment

E i primm panzànegh e i primm giughitt!

E adess che vedi passaa e present,

Troeuvi la vitta tutta ona storia.

De desideri, de patiment!

O sogn fantàstich de amor, de gloria,

Come sii in pràtega smort e sbiavaa! -

O campanella! che la memoria

Te me rinfrèschet del temp passaa!

Màndem sù l'aria quand saron via,

Màndem on èco per carita! –

Ma cosse disi? che fantasia! -

Putost in l'ùltem de sti mee dì

Sona, e consòlem in l' agonia ;

Se, come speri, moriroo chì!