Dedicato ad un'amica, che ci ha lasciato nel 2004

Per Marisa

Vorevi regalatt on rosc de stell,
per la lus che t'hee miss sul mè sentee;

vorevi regalatt tutt on giardin
de fior che passiss mai, d'or e d'argent;

vorevi regalatt on'armonia
de centmilla strument, domà per tì,

invece...de sto coeur on poo stranii,
de sta povera testa tutta grisa
gh'è sortii domà on fiaa:
"per tutt quell che t'hee faa,
Grazie Marisa!"

On fil de seda

I violitt je lassom a la Scala;
quell che me liga a tì, l'è on fil de seda
che 'l se ved nò, ma 'l gh'è
per ditt, ogni minutt, che mì son chì;

son chì a scoltà la toa poesia,
son chì a scoltà el rosari di tò cruzzi,
son chì de mamma, a piang, insèma a tì
per quell che te gh'hee nò e che gh'hoo mì.

L'è on brutt moment, 'n inferna,
forsi ne vegnarann anmò de pegg ...
ma in del moment vigliacch
che el coeur el par morì
sòna el mè campanell ... mì sarò chì.